Frétt í Morgunblaðinu:
"Nýjar mengunarreglur gætu hækkað opinber gjöld á nýjar bifreiðar um tugi prósenta. Til dæmis gætu opinber gjöld á nýja og mikið selda bifreið hjá einu umboðanna hækkað úr 1,75 milljónum í tæpar 2,6 milljónir króna.
Þetta má lesa úr útreikningum Bílgreinasambandsins. Tilefnið er að nýjar mengunarmælingar eru að taka gildi í ESB. Þær eiga að endurspegla betur en núverandi reglur hvað bílar menga í raun með því að byggja á raunhæfari aðstæðum við akstursprófanir. Með því eykst mæld eldsneytisnotkun og þar með losun koldíoxíðs.
Reglurnar munu að óbreyttu taka gildi á Íslandi. Fram kom í Morgunblaðinu í júní að starfshópur í fjármálaráðuneytinu er að skoða málið. Bílgreinasambandið hefur stillt upp tíu dæmum um áhrif þessara breytinga á opinber gjöld á nýjar bifreiðar. Annað dæmi bendir til að opinber gjöld á tiltekna nýja bifreið muni hækka úr 1,059 milljónum í 1,518 milljónir. Hækkunin er rúm 43%.
Mengunargildin hækka Þriðja dæmið er að opinber gjöld á nýja bifreið hækka úr 950 þúsund í 1.300 þúsund. Sú bifreið mengaði samkvæmt gömlu skilgreiningunni 119 grömm af CO2 á km en 139 grömm með nýju aðferðinni. Gildin geta því breyst mikið og gjöldin þar með. Frá 2011 hafa vörugjöld á bíla á Íslandi tekið mið af losun koldíoxíðs. Sama gildir um bifreiðagjöld.
María Jóna Magnúsdóttir, framkvæmdastjóri Bílgreinasambandsins, segir breytingarnar geta fært bifreiðar upp um tollflokka. Útreikningar sambandsins bendi til að í einhverjum dæmum geti vörugjöld hækkað um 90% á dæmigerðum fjölskyldubíl. María segir rannsóknarskýrslur ESB benda til að sparneytnari bifreiðar með minni vélar muni frekar mælast með hærra gildi en eyðslufrekari bílar með stórar vélar. Að óbreyttu muni hækkun mælds útblásturs leiða til þess að bílar hækki í verði, einkum þeir sparneytnustu.
María bendir jafnframt á að verð á bílum hafi farið lækkandi. Það hafi átt þátt í að halda niðri verðbólgu. Árið 2017 var metár í sölu nýrra bifreiða á Íslandi. Sala til bílaleiga vó þungt. Fyrir vikið hefur meðalaldur bílaflotans farið lækkandi. María segir að ef nýju reglurnar taka gildi á Íslandi án mótvægisaðgerða geti bílverð hækkað um tugi prósenta. Sagan sýni að slíkar hækkanir dragi verulega úr sölu. Afleiðingin verði sú að það hægi á endurnýjun bílaflotans. Með því muni flotinn menga meira en ella.
„Með yngri bílum á götunni erum við ekki aðeins að færast nær markmiðum okkar um að draga úr útblæstri heldur fáum við einnig bíla á götuna sem búa yfir öflugri öryggisbúnaði,“ segir María.
„Bílgreinasambandið hefur fulla trú á að íslensk stjórnvöld séu tilbúin til að fara í mótvægisaðgerðir svo innflutningstollarnir haldist sambærilegir. Ef ekkert er gert má reikna með að verð á bílum hækki mikið í haust og í vetur. Þetta mun ekki einungis bitna á fyrirtækjum og einstaklingum, því einnig munu bílaleigubílar hækka mikið í verði sem getur aftur dregið úr eftirspurn í ferðaþjónustu.“
Gunnar Rögnvaldsson hefur þetta um þetta að segja á sínu bloggi:
"Bjarni Benediksson formaður Sjálfstæðisflokksins er kannski við það að hefja lokaatrennuna gegn flokknum með því að framkvæma endanlegt pólitískt harakiri á Sjálfstæðisflokknum. En svo gæti farið ef lappirnar bregðast honum aftur, með þeim afleiðingum að vélknúin farartæki verða skattlögð út úr íslenska draumnum, sem þá breytist í enn verri ESB-martröð en orðið er. Enn svartari en þá martröð sem EES-samningurinn er að kalla yfir Ísland.
Uggandi Sjálfstæðimenn eru að komast í svo slæmt skap vegna þessa máls, að þeir mega varla mæla. Miðflokkurinn bíður eftir enn einni léttu bráðinni, fljótandi í innfluttu vatni."
Ætla stjórnvöld að láta þessar fyrirætlanir ESB yfir almenning ganga? Enn eitt CO2 bullið sem almennigur á að borga?
Á að stórhækka einkabíla og gleðja þar með Dag Bergþóruson og Hjálmar í meirihlutanum í Reykjavík?